மழைநீரை முறையாகச் சேமிப்போம்.

நீருக்கான பதற்றம் எப்போதும் நம்மைத் துரத்திக்கொண்டிருக்கிறது. ஆனால், அபரிமிதமான நீர் எப்போதும் நம்மைத்தேடி வருகிறது. அதை அலட்சியம் செய்துவிட்டுதான் நாம் நீருக்காகத் திண்டாடுகிறோம்.

மழைநீரை முறையாகச் சேமித்தாலே நீர் பற்றாக்குறையை பெருமளவில் போக்கிவிடலாம். வடகிழக்கு பருவமழை மூலம் கிடைக்கும் பெருமளவு மழைநீர் ஒவ்வொரு முறையும் கடலில் கலந்து வீணாவது தொடர்கதையாகி விட்டது. மழை நீரை வீணாக்காமல் நிலத்தில் சேமித்தால், நிலத்தடி நீர்மட்டம் உயரும். நீரின் தரமும் மேம்படும்.

மழை நீரை சேமிக்க நாம் எடுக்கும் சிறு முயற்சியும், மனித குலத்தை காக்கும். அதற்கு என்ன செய்ய வேண்டும்?

மழைநீர் சேகரிப்பு கட்டமைப்புகளை கட்டிடங்களில் உருவாக்கி பராமரிக்க வேண்டும். கட்டிடத்தின் மொட்டை மாடியில் இருந்து, மழை நீரை தரைப் பகுதிக்கு கொண்டு செல்ல வசதியாக, மழை நீர் வடிகுழாயை அமைக்க வேண்டும்.

வடிகுழாய்க்கு அல்லது கட்டிடங்களின் அருகில் தரை பகுதியில் 1 மீட்டர் நீளம், 1 மீட்டர் அகலம் மற்றும் 1.5 மீட்டர் ஆழத்துக்குக் கசிவு நீர்க்குழி ஒன்றை செங்கல் கொண்டு அமைக்க வேண்டும். அதன்பின் குழியை கூழாங்கற்கள் அல்லது கருங்கல் ஜல்லியை கொண்டு 1 மீட்டர் ஆழத்துக்கு நிரப்ப வேண்டும். மொட்டை மாடியில் இருந்து வரும் மழைநீரை, வடிகுழாய் மூலம் கசிவு நீர்க்குழியின் மேற்பரப்பில் விழுமாறு செய்ய வேண்டும். முறையாக கசிவு நீர்க்குழி அமைத்தால், மொட்டை மாடியில் விழும் மழை நீரை நேரடியாக பூமிக்குள் ஊறச்செய்யலாம். கசிவு நீர்க்குழியை சிமெண்ட் மூடியால் மூட வேண்டும்.

கட்டிடம் அமைந்துள்ள இடம் களிமண் பகுதியாக இருந்தால் உரிய முறையில் மழை நீர் சேகரிப்பு கட்டமைப்புகளை ஏற்படுத்த வேண்டும். மழை நீரை சேமிக்க நீரூட்டல் கிணற்றை அமைக்கலாம். கட்டிட வளாகத்தில் பயன்பாட்டில் இருக்கும் திறந்தவெளி கிணற்றையும் பயன்படுத்தலாம். கட்டிடத்தில் இருக்கும் மழை நீர் வடிகுழாய்களை இணைத்து கிணறு இருக்கும் பகுதிக்கு கொண்டு செல்ல வேண்டும். அங்கே வடிகட்டும் தொட்டி அமைத்தால் மொட்டை மாடியில் விழும் மழை நீரை, வடிகுழாய் மூலம் பயன்பாட்டு கிணற்றில் செலுத்தி மழை நீரை ஊறச்செய்யலாம்.

இதுவரை மழை நீர் கட்டமைப்புகள் அமைக்கப்படாமல் இருந்தால், தாமதமின்றி அதை உருவாக்கி மழை நீரை சேமித்து நீர் வளத்தை பெருக்கலாம். 

Read more...