'அட... போப்பா.. நீ வேற...

கண்டதைக் கடியதைத் தின்றுவிட்டு கன்னாபின்னாவென்று உடல் குண்டாகி கவலைப்படுகிறவர்களுக்கு உடல் எடையைக் குறைக்க ஒரு புதிய வழியைக் கண்டுபிடித்திருக்கிறார்கள் அமெரிக்காவில் உள்ள ஓரிகான் பல்கலைக் கழகத்தைச் சேர்ந்தவர்களும், கேப்டவுனில் உள்ள ஸ்டெலன்போஸ் பல்கலைக் கழகத்தைச் சேர்ந்தவர்களும்.

அப்படி என்ன வழி? உடல் எடையைக் குறைக்க வேண்டும் என்று நினைப்பவர்கள் காலையில் எழுந்து ஓட வேண்டுமாம். முன்னாலல்ல. பின்னால் ஓட வேண்டுமாம்.

பின்னால் ஓடினால் கலோரிகள் அதிக அளவில் எரிக்கப்பட்டு, உடல் எடை மளமளவென்று குறைந்துவிடுகிறதாம். பின்புறமாக ஓடினால் முன்னால் ஓடுவதைக் காட்டிலும் 2.5 சதவீதம் அதிகக் கொழுப்பு உடலில் இருந்து கரைந்து விடுகிறதாம். இதயநோய்கள், இரத்த அழுத்தம், மாரடைப்பு போன்றவை பின்னால் ஓடுபவரைக் கண்டதும் தலைதெறிக்க ஓடிவிடுகிறதாம். முதுகுவலி, மூட்டுவலி குறைந்துவிடுகிறதாம். இதுதவிர பின்னால் ஓடும்போது உடலை நன்கு பேலன்ஸ் பண்ண முடிகிறதாம். பின்னால் ஓடும்போது தலையைப் பின்னால் திருப்பி ஓரக்கண்ணால் பார்த்துக் கொண்டே ஓட வேண்டியிருக்கிறது. இதனால் ஓரக் கண் பார்வை வலுவடைகிறதாம்.

 எவ்வளவு தூரம் ஓடவேண்டும் ?

100 அடி பின்னால் ஓடுவது 1000 அடி முன்னால் ஓடுவதற்குச் சமம். அதனால் நீங்கள் முன்னால் ஓடுவதைவிட பத்துமடங்கு குறைவாகப் பின்னால் ஓடினால் போதும்.

இங்கிலாந்தில் பின்னால் ஓடுபவர்களுக்கென்றே போட்டிகள் வேறு வைக்கிறார்கள். வரும் ஆகஸ்ட் மாதம் மான்செஸ்டரில் இந்தப் போட்டி நடைபெறவிருக்கிறது.

என்ன பின்னால் ஓடத் தயாராகிவிட்டீர்களா?

'அட... போப்பா.. நீ வேற... காலையில் எழுந்து நடைப் பயிற்சியே செய்ய முடியலை... இதுல எங்க பின்னால ஓடுறது...' என்று அலுத்துக் கொள்கிறீர்களா? உங்கள் குண்டு உடலை யாராலும் எதாலும் ஒன்றுமே...மே.... செய்ய முடியாது!

அப்ப்டி ஓடினால் ஆட்டோ, இருசக்கரவாகனம் ஓடாத நேரத்துலே பார்த்து ஓடுங்க,,,

Read more...

கோடையில் குழந்தைகளை காக்க, சில வழிமுறைகளை கடைபிடிக்க வேண்டும்

கோடை காலத்தில் அதிக வெப்பம் குழந்தைகளை எளிதில் பாதிக்கிறது. குழந்தைகளின் உடலில் பல மாற்றங்களை உருவாக்கி, அதிக சோர்வு, தாகம், சளி, கணை, நுரையீரல் நோய்கள் ஏற்படுகின்றன. இவற்றை தவிர்க்க சில வழிமுறைகளை கடைபிடிக்க வேண்டும்

வயிற்றுப் போக்கு: பொதுவாக ஆறு வயதுக்குட்பட்டோரை அதிகம் பாதிக்கிறது. 80 சதவீதம் வைரஸ் கிருமிகளால் ஏற்படும். இதுவாந்தியுடன் ஏற்பட்டு, உடலில் தண்ணீர் சத்து, சோடியம், பொட்டாசியம் போன்ற தாதுக்களை உடலில் இருந்து வெளியேற்றுகிறது.

அறிகுறிகள்: தலையின் உச்சியில் பள்ளம் ஏற்படுதல். கண்கள் குழிவிழுந்த நிலை, நாக்கில் ஏற்படும் வறட்சி, அதிக நீர்த்தாகம், தோல் தனது எலாஸ்டிக் தன்மையை இழத்தல், சிறுநீர் பிரிவது குறைதல் போன்றவை.

தவிர்க்கும் வழி: உப்பு, சர்க்கரை கரைசல் தொடர்ச்சியாக, கொஞ்சம், கொஞ்சமாக கொடுக்க வேண்டும். ஓ.ஆர்.எஸ்., என்ற உப்பு சர்க்கரை கரைசலை உடனடியாக கொடுக்க வேண்டும். இளநீர், கஞ்சி போன்றவை கொடுக்கலாம். தாய்ப்பால் அருந்தும் குழந்தைக்கு, தொடர்ச்சியாக தாய்ப்பால் தரவேண்டும். வயிற்றுப் போக்கின் போது, வழக்கமாக எந்த ஆகாரத்தை சாப்பிட்டுக் கொண்டு இருக்கிறதோ, அதையோ தொடர்ந்து மசித்து கொடுக்க வேண்டும். வயிற்றுப் போக்கு நின்றவுடன் ஒருவேளை உணவு கூடுதலாக கொடுக்க வேண்டும்.

காலரா: காலரா ஏற்படும்போது அதிக வாந்தி, அரிசி கஞ்சி நிறத்தில் அதிக நீருடன் கலந்த வயிற்றுப் போக்கு, மலம் துர்நாற்றத்துடன் வெளியேறும் நிலை ஏற்படும். அசுத்த நீர், பாதுகாப்பற்ற பழைய ஆகாரம் உண்பதால் ஏற்படும். ஓ.ஆர்.எஸ்., உப்புக்கரைசல், குளோரின் கலந்த தண்ணீர் அருந்துவதால் இதை தவிர்க்கலாம். டாக்ஸிசைகின் மாத்திரையை உபயோகிக்கலாம்.

டைபாய்டு காய்ச்சல்: பாதுகாப்பற்ற குடிநீர், ஈமொய்த்த பண்டம், குளிர்ச்சியான பானங்கள், ஐஸ்கிரீம் போன்றவை காரணம். விட்டுவிட்டு காய்ச்சல் வருவது. நாக்கில் வெள்ளை நிற மாற்றம் இதன் அறிகுறிகள்.

தடுக்கும் முறை: இரண்டு வயதில் டைபாய்டு தடுப்பூசி, பாதுகாப்பான நீர் அருந்துதல், கண்ட இடங்களில் குழந்தைகள் மலஜலம் கழிக்காமை, வீட்டின் அருகில் கழிவுநீர் தேங்காமல் பார்ப்பது மூலம் தடுக்கலாம். புதிய உணவுகளை அருந்த வேண்டாம். ஐந்து வயதில் மீண்டும் ஒருமுறை டைபாய்டு தடுப்பூசி போட வேண்டும்.

கொப்பளிப்பான் அம்மை: ஆறு வயதுக்குட்பட்டோரை அதிகம் பாதிக்கிறது. தொடர்ச்சியான பசியில்லாதது, உடம்பு வலி, நீர்கோதிய கொப்புளங்கள். இது வைரஸ் கிருமியால் ஏற்படும். குழந்தைக்கு ஒருவயது ஆனவுடன் சிக்கன்பாக்ஸ் தடுப்பூசி போட வேண்டும்.

மணல்வாரி அம்மை: இதுவும் வைரஸ் கிருமியால் ஏற்படுகிறது. குழந்தையின் வாயின் நீர்த்துளிகள் வழியாக தொடரக்கூடிய தொற்றுநோய். தொடர்ச்சியான காய்ச்சல், மூக்கு ஒழுகுதல், கண்கள் சிவப்பு, வறட்டு இருமல், இளஞ்சிவப்பு திட்டுக்கள், காதின் பின்பகுதி துவங்கி, நெற்றி, முகம், கழுத்து, மார்பகம், வயிறு என எல்லா பகுதிக்கும் பரவுகிறது. இதற்கு கேலமைன் லோஷன் தடவலாம். திரவ ஆகாரங்கள் கொஞ்சம், கொஞ்சமாக கொடுக்க வேண்டும்.

வேனில் கொப்புளங்கள்: உடம்பில் வெப்பநிலை மாற்றத்தால் வேனில் கொப்புளம் ஏற்படும். இதற்கு குறைந்தபட்சம் 3 முதல் 4 லிட்டர் அருந்தவேண்டும். பருத்தி ஆடைகளை அணியலாம். இளநீர், பழரசங்கள், உப்புடன் நாட்டுச் சர்க்கரை கலந்த எலுமிச்சம் பழச்சாறு, தர்ப்பூசணி பழச்சாறு அருந்தலாம்.

வைரஸ் காய்ச்சல்: இது தொடரக்கூடிய வியாதி. தொடர்ச்சியான காய்ச்சல், அதிக உடம்பு வலி, பசியில்லாத நிலை, அதிக சோர்வு, தொடர்ச்சியாக ஐந்து நாட்கள் இருக்கும். உடனே சிகிச்சை பெற வேண்டும்.

மதுரை அரசு ஆஸ்பத்திரியின் சிசுநலப் பிரிவு முன்னாள் தலைமை டாக்டர் ஜி.கிருஷ்ணன்.

Read more...