உண்மையான காரணகர்த்தர்கள் யார் ?

தூக்கத்தை இழந்து ரொம்ப நாளாச்சுப்பா... என்ற புலம்பல் சப்தம் எங்கும் எதிரொலிக்கிறது.

மனிதனுக்கு ரொம்ப அவசியமானது தூக்கம். குறிப்பிட்ட சில மணிநேரமாவது ஒரு மனிதன் உறக்கத்துக்கு ஒதுக்கியாக வேண்டும். இன்றைக்கு அந்த சில மணித்துளிகளும் தூங்கமுடியாமல் தவிப்பதற்கு யார் காரணம்? கொசுக்களா? இல்லை இவற்றைக் கட்டுப்படுத்த தவறிய மக்கள் பிரதிநிதிகளா? என்ற விவாதம் ஒருபுறம் நடக்கிறது.

இதற்கெல்லாம் ஒருபடி மேலே போனால் உண்மையான காரணகர்த்தர்கள் யார் என்பது புரியும். இயற்கைக்கு முரணான செயல்களைப் பெரும்பாலானோர் தைரியமாகவும், எதார்த்தமாகவும் செய்யப் பழகிவிட்டு, இப்போது புலம்புவதில் பயன் என்ன?

இன்றைக்கு வானுயர்ந்த கல்வி நிறுவனங்கள், தொழிற்சாலைகள், மாளிகை குடியிருப்புகள், மருத்துவமனைகள் பார்ப்பதற்கு கண்ணுக்கு அழகாகவும், கம்பீரமாகவும் காட்சியளிக்கின்றன.

இவற்றுக்காக எத்தனை குளம், குட்டைகள், மழைநீர் வரத்துக்கால்வாய்கள் போன்றவற்றை நாம் இழந்திருக்கிறோம் என்பதை யாராவது நினைத்துப் பார்க்கிறோமா?

முறையான இடத்தில் அரசு அங்கீகாரத்தையும் முறையாகப் பெற்று கட்டடம் கட்டியவர்களும் இருக்கத்தான் செய்கின்றனர். இந்த வகையினர் சொற்ப அளவில் தான் இருக்கின்றனர்.

மூதாதையர் உருவாக்கிய குளம், குட்டைகள், கால்வாய்களை இருந்த இடம் தெரியாமல் அழித்துவிட்டதைக் கண்டிக்க யாருக்காவது துணிச்சல் இருக்கிறதா?

ஆக்கிரமிப்பாளர்களின் பிடியில் சிக்கியுள்ள குளம், குட்டைகள் மற்றும் கால்வாய்களின் வடுக்களாக ஆங்காங்கே சிறு சிறு பகுதிகளாக வெளித்தெரியும் இடங்கள் கழிவுநீர் தேங்கும் பகுதிகளாக மாற்றப்பட்டுள்ளன. இவற்றில்தான் கொசுக்கள் விதவிதமாக அபரிமிதமாக உற்பத்தியாகின்றன.

இவற்றை ஒழிக்கப்போகிறோம் பேர்வழிகளாக தங்களை முன்நிறுத்திக் கொண்டு, மாநகரங்கள் முதல் குக்கிராமங்கள் வரை கொசுமருந்துகளைத் தெளிக்கின்றனர் உள்ளாட்சி அமைப்பினர். வீரியம் குறைந்த மருந்துகளைத் தொடர்ச்சியாக தெளிப்பதை விடுத்து, அவ்வப்போது மருந்து தெளிப்பை நடத்திவிட்டு கொசுக்களை ஒழிப்பதாக கூறுகின்றனர்.

ஆனால், இன்றைக்கு என்ன நிலைமை. தரம் குறைந்த, வீரியம் குறைந்த மருந்துகளைத் தெளிப்பதால் கொசுக்கள் ஊட்டச்சத்து மருந்து போன்று அவற்றை உள்கொண்டு  மேலும் மேலும் உற்பத்தியாவதாகத்தான் தெரிகிறது.

சிங்கப்பூர் போன்ற நாடுகளில் கொசுக்களை ஒழிக்கப் பயன்படுத்தப்படும் "ஆயில்பால்', "கொசுக்களைக் கொல்லும் மீன்கள்' ஆகியவற்றை சில மாநகரங்களில் பயன்படுத்த பல கோடியில் திட்டங்களை அறிவித்தனர். இந்த திட்டங்கள் என்னவாயிற்று என்பது இன்றுவரை புரியாத புதிராக இருக்கிறது.

ஆறுகளையும் ஆக்கிரமிப்பாளர்கள் விட்டுவைத்துள்ளார்களா? மணல் கொள்ளை ஒருபுறம் நடக்கிறது. இன்னொருபுறம், இடங்கள் ஆக்கிரமிக்கப்பட்டு, பல ஆயிரம் கட்டடங்களாக மாற்றப்பட்டுள்ளன.

குடியிருப்பு பகுதிகளின் கழிவுநீர் கால்வாயாகவும் ஆறுகள் மாற்றப்பட்டு வருகின்றன. இவற்றிலும் அபரிமிதமாக கொசுக்கள் உற்பத்தியாகி வருகின்றன.

இப்படி கொசுக்கள் உற்பத்திக்கு ஊக்கங்களைக் கொடுத்துவரும் அதிகாரிகளையும், மக்கள் பிரதிநிதிகளையும் தட்டிக்கேட்கத் தவறிவிட்டு, இப்போது கூப்பாடு போடுவதில் என்ன நியாயம் இருக்கிறது?

இப்போதுள்ள நிலையில் தூக்கத்தை மட்டும்தான் இழந்திருக்கிறோம். இனியும் இதுபோன்ற விதிமீறல்களைக் கைகட்டி வேடிக்கை பார்த்துக் கொண்டிருந்தால், எதிர்காலச் சந்ததிகளுக்கு கொசுக்களால் கண்டறிய முடியாத நோய்கள் பரவக்கூடிய பேராபத்தையும் உருவாக்கிவிடுவோம் என்பதை பொதுஜனங்கள் மட்டுமன்றி, மக்கள் பிரதிநிதிகளும், சம்பந்தப்பட்ட அதிகாரிகளும் உணர்ந்து செயல்பட வேண்டும்.

நீர்நிலைகள் ஆக்கிரமிப்புகளுக்கு இனியாவது முடிவுகட்டுவோம். முறையான கொசு ஒழிப்பு பணிகள் நடைபெற உள்ளாட்சி அமைப்பினரும் உறுதிஎடுத்துக் கொள்ள வேண்டும். இதன்மூலம் கொசுக்களை முழுமையாக ஒழிக்காவிட்டாலும், கட்டுப்படுத்தி  தூக்கத்தையாவது  இழக்காமல் தவிர்க்க முடியும்.

Read more...

எந்த ஒரு இடத்துக்கும் நிச்சயமாக மாற்று வழி இருந்தே ஆக வேண்டும்.

சூழ்நிலைகள் மனிதர்களை உருவாக்குவது அல்ல. மாறாக தான் யார், எவ்வாறு நிகழ்வுகளை எதிர்கொள்கின்றோம் என்பதை அறிந்து கொள்ள உதவும் காரணியே. நாம் ஒவ்வொருவரும் வெவ்வேறு வகையான சூழ்நிலைகளில் பல்வேறு வகையான நிகழ்வுகளை சந்திக்கின்றோம். சாதாரணமான நிகழ்வுகளை எளிதானவை என்று சொல்லி எதிர்கொள்கின்றோம். சிக்கலான நெருக்கடியான நிகழ்வுகளை எதிர்கொள்ள பெரிதும் அஞ்சுகின்றோம். ஆனால் அது போன்ற சிக்கலான, நெருக்கடியான நிகழ்வுகளை எதிர்கொள்ளுவது எப்படி?  .

வாழ்விலும், வியாபாரத்திலும் திட்டமிட்ட நிகழ்வுகள் எப்போதாவது நிகழ்கின்றன. எந்த அளவு கீழே விழுவோம் என்பதை விட எந்த அளவு விரைவாக மேலே எழுவோம் என்பது தான் முக்கியம்.  

ஒவ்வொரு தனிநபரின் வாழ்விலும் ஏற்புடையதாகும். வியாபாரத்திலும் இது போன்றே எதிர்பாராத மாற்றங்களும், ஆக்கிரமிப்புகளும் நிகழ்கின்றன. இது போன்ற நேரங்களில் தலைவர்களாக இருப்பவர்கள் சரியான முடிவு மற்றும் நடவடிக்கை இவற்றின் மூலமாக எதிரிகளை வென்று தங்களை வலுப்படுத்திக் கொள்கிறார்கள்.

இதற்கு மங்கோலிய சாம்ராஜ்யம் சரியான எடுத்துக்காட்டாகும். விடாமுயற்சியை போல வெற்றிக்கு வித்திடும் குணாதிசயம் வேறு ஏதும் இல்லை, விடாமுயற்சி தன்னம்பிக்கையை வளர்க்கும், தன்னம்பிக்கை இலக்கை அடைய வழிகாட்டும்.

உணர்வுகளை கட்டுப்படுத்தி சரியான கேள்விகள் கேட்பதன் மூலம் தீர்வுகள் காண வேண்டுமே தவிர உணர்வு பூர்வமாக ஒரு தீர்வை அடைய முடியும் என நம்புவர்கள் கானல் நீரை அடைய முயற்சிப்பதற்கு சமமாகும்.

ஏற்கனவே நடந்த நிகழ்ச்சிகளை நினைவு கூர்ந்து எந்த சூழ்நிலையிலும் எந்த பிரச்சினைகளையும் சமாளிக்க கூடிய திறமையை வளர்த்துக்கொள்ள வேண்டும். எந்த ஒரு மோசமான முடிவும் ஏற்படுவதற்கான சாத்திய கூறுகளை ஏற்றுக் கொண்டு அவை நிகழாவண்ணம் செயல்படவேண்டும். வெற்றியும் தோல்வியும் தொடர்ச்சியாக நிகழ்வன அல்ல. மாறி மாறி நடக்கும்போது வேறு வேறு விளைவுகள் ஏற்படும் என்பதை உணர வேண்டும்.

நடந்ததை எண்ணி அவைகளை மேற்கோள் காட்டி பேசுவதைத் தவிர்க்க வேண்டும். நூறு விழுக்காடு எந்த ஒரு பிரச்சினையையும் எதிர்கொண்டு அடுத்தவரை குறை கூறாமல் நிகழ்வுகளை நம் கட்டுப்பாட்டுக்குள் வைத்திருக்க வேண்டும்.

‘கவிழ்ந்த பால் கலயம் ஏறாது’, ‘இழப்பதற்கு இனி எதுவும் இல்லை’ என்ற மனப்பான்மை இருந்தால், எந்த சூழலிலும் நமக்கு தேவை இல்லை என்றால் விட்டு விலகுதலே சரியாகும்.

நெருக்கடிகளை எதிர்கொள்ளும்போது ஒரே ஒரு வழிதான் என்ற எண்ணத்தை மாற்றவேண்டும் அந்த பிரச்சினைக்கு எந்த அளவு விதவிதமான வித்தியாசமான தீர்வுகள் இருக்கும் என்பதை உணர வேண்டும் அதற்கான நடவடிக்கைகளை மேற்கொள்தல் நன்று. ஏனென்றால் எந்த ஒரு இடத்துக்கும் நிச்சயமாக மாற்று வழி இருந்தே ஆக வேண்டும்.

நம்மில் சிலர் பிரச்சினைகளை தீர்ப்பதற்கு மாறாக, அதை இடியாப்ப சிக்கலாக்குவதில் மிக தீவிரமாக இருப்பார்கள். பிரச்சினைகளுக்கு சாதாரண தீர்வுகள் உண்டு. ஆனால் சாதாரண தீர்வுகள் பிரச்சினைகளையும் நெருக்கடிகளையும் தீர்க்க உதவாது. இந்த எண்ணத்தில் பிரச்சினைகளை சிக்கலாக்குபவர்களே அதிகம். எனவே எந்த பிரச்சினையையும் அளவுக்கு அதிகமான கற்பனை செய்து அதனால் ஏற்படும் நெருக்கடிகளை தவிர்ப்பது இன்றியமையாதது ஆகும்.

உள்மனதின் கருத்துகள் பெரும்பான்மையான நேரங்களில் கேட்கப்படுவதில்லை. மாறாக ஆழ் மனதில் தோன்றும் சிறிய கருத்து செறிவையும் முக்கியமானதாக எடுத்துக்கொள்ள வேண்டும். அவ்வாறு எடுத்துக்கொள்ளும் கருத்துச் செறிவுகள் நெருக்கடிகளை நேர்காண உற்ற துணையாக இருந்து உதவும்.

இறைவன் நல்லவர்களை மட்டுமே அதிகம் சோதிப்பார் என்று அக்கம் பக்கத்தில் பேசும் செய்தியை நாம் புறம் தள்ளுகின்றோம். ஆனால் அதில் உள்ள கருத்து ஒழுக்கமும், சிறந்த குணமும் எதையும் எதிர்கொள்ள உதவும் என்பதே ஆகும். எனவே, ஒழுக்கமும், சிறந்த குணமும் நெருக்கடி நேரங்களில் அவற்றை அதிரடியாக தீர்க்க உதவுகின்றன.

வெல்லும்வரை விடக்கூடாது என்ற மனப்பாங்கு வெகுவானவர்களிடம் இருப்பதில்லை. இன்னும் சிறிது தூரம் மேலே ஏறி இருந்தால் பள்ளத்தில் இருந்து நிலப்பரப்புக்கு வந்து விடலாம். ஆனால், அந்த கடைசி நான்கு அல்லது ஐந்து அடி உயரம் ஏறுவதில் மனம் தளரும்போது நிலப்பரப்பை அடைவது கனவாக முடிகிறது. ஆக வெல்லும் வரை விடக்கூடாது என்பது நெருக்கடிப் பணியை உருகச் செய்யும் மனப்பாங்காகும்.

பலம் மற்றும் பலவீனம் என்பது இரு கூறுகளாக மனிதர்களை பிரிக்கின்றது. பலம் என்பது ஒருவர் விடாப்பிடியாய் ஒரு கருத்தை ஏற்பது. பலவீனம் என்பது ஒரு கருத்தை தயக்கத்துடனும், தடுமாற்றத்துடனும், அற்ப காரணங்களுக்காகவும் தவிர்த்து பிரச்சினைகளில் மூழ்கிவிடுதல் ஆகும்.

எதை, எப்பொழுது, எங்கே, எவ்வாறு சரியாக செய்வது என்பதில் தான் வெற்றியின் சூட்சமம் அடங்கி உள்ளது. அவ்வாறு செய்பவர்கள் நெருக்கடிகளை நேர்கொண்டு பஞ்சாக ஊதிவிடுவார்கள்.

முயற்சி இல்லாத லாபம், பயம் இல்லாத அனுபவம், வெகுமதி இல்லாத வேலை இவை அனைத்தும் பிறக்காமலே வாழ்வதற்கு ஒப்பாகும். இது மிகைப்படுத்தபட்ட கூற்று அல்ல.

Read more...