மாவு பவுடரில் தூள் கிளப்புங்க!

முதுமையில் எட்டிப் பார்க்கிற பல அழகுப் பிரச்னைகளும் இன்று டீன் ஏஜிலேயே வருகின்றன. முடி கொட்டுவது, நரைத்துப் போவது எனக் கூந்தலிலும், பருக்கள், கருமை, சுருக்கங்கள் என சருமத்திலும் ஆளாளுக்கு ஆயிரம் பிரச்னைகள்.

டீன் ஏஜில் பிள்ளைகள் இருக்கிறார்கள் என்றால் நம்பமுடியாத தோற்றம் ஜெயலட்சுமிக்கு. தனது இளமையான தோற்றத்துக்குக் காரணம், தான் உபயோகிக்கிற இயற்கை அழகுசாதனங்கள் என்கிற ஜெயலட்சுமி, உடம்பு தேய்த்துக் குளிக்க நலங்கு மாவு, தலைக்குத் தேய்த்துக் குளிக்க சீயக்காய், கூந்தலை இயற்கையான முறையில் கருப்பாக்கும் ஹென்னா பவுடர், இன்னும் பருக்களை விரட்டும் பேக், சரும நிறத்தைக் கூட்டும் பேக் என இயற்கை அழகுசாதனத் தயாரிப்புகளில் எக்ஸ்பர்ட்!

‘‘எனக்கு கேரளா பக்கம். கேரளத்துப் பெண்களோட சரும, கூந்தல் அழகைப் பத்தி சொல்லித் தெரிய வேண்டாம். தினம் தலைக்குத் தடவற எண்ணெய் ஆகட்டும், தேய்ச்சுக் குளிக்கிற பொடி ஆகட்டும்... ஏதாவது மூலிகை கலந்ததாத்தான் இருக்கும். சென்னைல செட்டிலான பிறகும் நான் எங்க ஊர் வழக்கப்படி அதையே உபயோகிச்சிட்டிருந்தேன். அக்கம்பக்கத்துல உள்ளவங்க, தெரிஞ்சவங்க கேட்டாங்கனு கொடுக்க ஆரம்பிச்சு இன்னிக்கு அதுவே எனக்கு முழுநேரத் தொழிலாயிடுச்சு’’ என்கிற ஜெயலட்சுமி, விருப்பமுள்ளோருக்கு இத்தொழிலில் ஈடுபட வழிகளைக் காட்டுகிறார்.

என்னென்ன தேவை? முதலீடு?

‘‘மூலிகைகள், நலங்கு மாவுக்கான பொருள்கள் எல்லாம் பாரிமுனைல மொத்த விலைக்குக் கிடைக்கும். அது தவிர பேக்கிங் கவர், சீலிங் மிஷின், வெயிட் மிஷின்... எல்லாம் சேர்த்து ஆயிரத்து 500 ரூபாய் முதலீடு போதும்.’’

என்னென்ன வெரைட்டி? என்ன ஸ்பெஷல்?

‘‘மூலிகை சீயக்காய் பொடி தலைமுடி உதிர்வு, பேன் தொல்லை, பொடுகுக்கெல்லாம் நிவாரணம் தரும். முகத்துக்கான பேக்ல 18 மூலிகை சேர்த்துப் பண்றேன். நிறம் கூடும். பருக்களுக்கான பேக், பருக்களையும் தழும்புகளையும் விரட்டும். ஹென்னா பேக் நரையை மறைச்சு, பொடுகு, புழுவெட்டுக்குத் தீர்வு தரும். நலங்கு மாவு, வியர்வை நாற்றத்தைப் போக்கி, சருமநோய் வராம தடுக்கும். கெமிக்கல் கலக்காததால, எல்லாருக்கும் ஏத்துக்கும்.’’

விற்பனை வாய்ப்பு? லாபம்?

‘‘நாட்டு மருந்துக் கடைகள்ல விற்பனைக்குத் தரலாம். பியூட்டி பார்லர்களுக்கு சப்ளை பண்ணலாம். 50 சதவீத லாபம் நிச்சயம்.’’

பயிற்சி?

‘‘ஒரே நாள் பயிற்சில அத்தனையும் கத்துக்க 400 ரூபாய் கட்டணம்.’’

Read more...

இன்ஜினியரிங்' மட்டுமே படிப்பா?

சென்னை:இன்ஜினியரிங் படிப்பில் சேர்ந்தால் போதும், கார்ப்பரேட் நிறுவனத்தில் எக்கச்சக்க சம்பளத்தில் வேலை கிடைத்தது போன்ற மனப்பாங்கு, இன்றைய மாணவர்களையும், பெற்றோரையும், இன்ஜினியரிங் படிப்பு மீது, அதீத மோகத்தில் ஆழ்த்தியுள்ளது. ஆனால் கடந்தாண்டில், இன்ஜினியரிங் முடித்த சுமார், 50 ஆயிரம் பேருக்கு வேலை இல்லை.

வெறும் மோகத்தால், இன்ஜினியரிங் படிப்பில் கண்ணை மூடிக்கொண்டு சேரும் மாணவர்களின் அதிகரிப்பால், 1997ம் ஆண்டில் வெறும் 90ஆக இருந்த, தமிழக இன்ஜினியரிங் கல்லூரிகளின் எண்ணிக்கை, கடந்தாண்டு நிலவரப்படி, 535ஆக உயர்ந்தது. கடந்த 2007ம் ஆண்டில் கூட, 277 இன்ஜினியரிங் கல்லூரிகள் தான் இருந்தன. நான்கு ஆண்டுகளில் இருமடங்காக, இன்ஜினியரிங் கல்லூரிகளின் எண்ணிக்கை உயர்ந்துள்ளது குறிப்பிடத்தக்கது. இந்தாண்டில் புதியதாக மேலும், 15 இன்ஜினியரிங் கல்லூரிகள் துவங்கப்பட உள்ளன.

இவ்வாறு தமிழகத்தில் ஆண்டுதோறும், இன்ஜினியரிங் கல்லூரிகளின் எண்ணிக்கை அதிகரித்துக் கொண்டே செல்கிறது.கல்லூரிகளின் எண்ணிக்கை உயர்வோடு, புதியது புதியதாக உருவாகும் இன்ஜினியரிங் பாடப்பிரிவுகளும், அவற்றின் மாணவர் சேர்க்கை இடங்களும் அதிகரித்து, 2.5 லட்சமாக உச்சானிக்கு உயர்ந்துள்ளது. ஆண்டுதோறும் நாடுமுழுவதும், 15 லட்சம் மாணவர்கள் இன்ஜினியரிங் படித்து வெளிவரும் நிலையில், இதன் எண்ணிக்கை தமிழகத்தில் மட்டும், 2.25 லட்சமாக உள்ளது. இன்ஜினியரிங் கல்லூரிகளும், மாணவர் சேர்க்கை இடங்களும் உயர்ந்த அளவிற்கு, அதற்கான வேலைவாய்ப்புகள் அதிகரித்துள்ளனவா? வேலைவாய்ப்புக்கு ஏற்ற தகுதிகளையும், திறமையையும் பெற்று கல்லூரியை விட்டு வெளிவருகின்றனரா?

தெளிவான சிந்தனையும், உண்மையான ஆர்வமும் இன்றி, மாயையில் இன்ஜினியரிங் படிப்பை தேர்வு செய்பவர்கள் எண்ணிக்கை கணிசம். இந்நிலையில், தற்போது தமிழக இன்ஜினியரிங் கவுன்சிலிங் விண்ணப்பங்கள் விற்பனை துவங்கிய ஒரே வாரத்தில், 2 லட்சம் விண்ணப்பங்கள் விற்று தீர்ந்துவிட்டன. இதற்கு, இன்ஜினியரிங் படிப்பில் சேர்ந்தால் போதும் வேலையும், கைநிறைய சம்பளமும் கிடைத்துவிடும் என்பது போன்ற, மாயை தான் முக்கிய காரணம் என்பதை உணரமுடிகிறது.உண்மையான ஆர்வமின்றி, வெறும் மோகத்தால் இன்ஜினியரிங் படிப்பில் சேர்ந்து, பிறகு படிப்பை தொடரவும் முடியாமல், நிறைவு செய்யவும் முடியாமல் தவிக்கும் மாணவர்களையும் காண முடிகிறது. விளைவு, தமிழகத்தில் 10 சதவீதம் இன்ஜினியரிங் பட்டதாரிகள் தான் உண்மையான வேலைத் திறன் பெற்றுள்ளனர் என்கிறது ஆய்வு.

தரமான மாணவர்களுக்கு மட்டுமே சிறந்த வேலை வாய்ப்பு என்பது இன்ஜினியரிங் துறையில் நிதர்சனம். இதற்கு சிறந்த உள்கட்டமைப்பு வசதிகள், திறமையான அனுபமிக்க ஆசிரியர்கள் இடம்பெற்றுள்ள தரமான கல்லூரிகளும், முக்கிய காரணமாக அமைகிறது என்கின்றனர், கல்வியாளர்கள்.

""மிகச் சிறந்த கல்லூரிகளில் வேலைவாய்ப்பு விகிதம் 95 ஆகவும், மூன்றாம் மற்றும் நான்காம் தர கல்லூரிகளில் வேலைவாய்ப்பு விகிதம், 30 முதல் 50 சதவீதமாகவும் இருக்கிறது. எனினும், 30 சதவீதம் பேர் தான் படிப்பிற்கேற்ற துறையில் வேலை பெறுகின்றனர்; 20 சதவீதம் பேர் உயர்கல்விக்கும், 30 சதவீதம் பேர் சம்பந்தமே இல்லாத வேலைக்கும் சென்று விடுகின்றனர். படிப்பை நிறைவு செய்யாமலும், வேலை கிடைக்காதவர்களும், மீதமுள்ள 20 சதவீதத்தினர்'' என்கிறார், கல்வி ஆலோசகர் ஜெயப்பிரகாஷ் காந்தி.

சிறந்த கல்லூரிகளில் அனைத்து மாணவர்களாலும் இடம் பெற முடியாது. சராசரிக்கும் அதிகமான மதிப்பெண் பெறும் மாணவர்கள் இரண்டாம், மூன்றாம் தர கல்லூரிகளில் சேர்க்கை பெறுகின்றனர். எப்படியாவது இன்ஜினியரிங் படிப்பில் சேர்ந்துவிட வேண்டும் என்ற எண்ணத்தில் தரமற்ற கல்லூரிகளில் பலர் சேர்கின்றனர். அதன்பிறகும், படிப்பில் உரிய கவனம் செலுத்தாமல், போதிய வேலைவாய்ப்பு திறன்களையும் வளர்த்துக்கொள்ளாமல் வேலை இல்லாத இன்ஜினியரிங் மாணவர்களும், ஒருபுறம் அதிகரித்து வருகின்றனர்.

இந்த எண்ணிக்கை, கடந்தாண்டில் சுமார் 50 ஆயிரம்.மாணவர்கள் பலரும் இன்ஜினியரிங் என்று சென்றுவிடுவதால், பிற துறைகளில் திறமையுள்ளவர்களுக்கான தேவை அதிகரித்துக் கொண்டே செல்கிறது. இவ்வாறு, மனிதவளம் தேவையுள்ள பல்வேறு பணிக்கு ஆட்கள் பற்றாக்குறையும், மிகக் குறைவான ஆட்களே தேவைப்படும் பணியிடங்களுக்கு, பெரும் போட்டியும் நிலவிவருகிறது.

இன்ஜினியரிங் படித்த அனைவருக்கும் பெரிய நிறுவனங்களில், உயர் சம்பளத்தில் வேலை கிடைப்பது சாத்தியமில்லை. இன்ஜினியரிங் தவிர, அனிமேஷன், பிசியோதெரபி, மரைன், சட்டம், ஹோட்டல் மேனேஜ்மென்ட், மீடியா, சுற்றுலா மற்றும் பி.ஏ. பொருளியல், பி.எஸ்சி., பி.காம்., போன்ற பல்வேறு கலை அறிவியல் படிப்புகளுக்கான வேலை வாய்ப்புகளும், பிரகாசமாக உள்ளன என்கின்றனர் கல்வியாளர்கள்.எனவே மாயையை தவிர்த்து, வாய்ப்புகள் மிகுந்த பிற துறைகள் குறித்த விழிப்புணர்வை மாணவர்கள் பெற வேண்டும். துறை சார்ந்த அறிவையும், திறமையையும் வளர்த்துக்கொள்வதன் அவசியத்தையும், மாணவர்கள் உணரவேண்டும்.

வாய்ப்புகள் நிறைந்த பிற துறைகள்:
பொருளாதாரம்
அனிமேஷன்
வணிகவியல்
சட்டம்
வங்கி மற்றும் இன்சூரன்ஸ்
ஹோட்டல் மேனேஜ்மென்ட் மற்றும் சுற்றுலா
மீடியா
மரைன்
கலை அறிவியல்

Read more...

சில்லரை வர்த்தகத்தில், வெளிநாட்டு நிறுவனங்களால் பயன் ?

சில்லரை வர்த்தகத்தில், வெளிநாட்டு நிறுவனங்களும் முதலீடு செய்யலாம் என்ற ஆபத்தான முடிவை, மத்திய அரசு எந்தவித முன்னறிவிப்பும் இன்றி செய்துவிட்டது. அமெரிக்கா போன்ற மேலை நாடுகளில், இந்த நிறுவனங்களால் மக்களுக்கும், அரசுக்கும் பெரிய லாபம் ஒன்றும் இல்லை; இவை செய்த தீமை ஏராளம்! இந்நிறுவனங்கள், ஒரு குறிப்பிட்ட பொருளை விற்பதில்லை. மளிகை, காய்கறி, பழங்கள், துணி வகைகள், இன்னும் லாபம் வரும் இடங்களில் எலக்ட்ரானிக்ஸ், பர்னிச்சர், ஏன் சில இடங்களில், டூவீலர் மற்றும் கார்களுக்கான உதிரி பாகங்களும் விற்கின்றன. அதேபோல, அங்கு வரும் வாடிக்கையாளர்களுக்காக உணவகமும் உண்டு. சென்னை, ரங்கநாதன் தெரு கடைகள் எல்லாம், இவற்றைப் பார்த்து தான் கடந்த, 10 வருடங்களாக தங்கள் வியாபார வடிவமைப்பை செய்து கொண்டன. ஆனால், இவற்றை சிறு கடைகளால் நிறைவேற்ற முடியாது. இந்நிறுவனங்கள், முக்கால்வாசி தங்கள் சொந்த, "பிராண்டை' தான் விற்கின்றன. உணவுப் பொருட்கள் சீக்கிரம் கெட்டு விடும் தன்மை கொண்டவை. உணவுப் பொருட்களைத் தவிர, மற்ற அனைத்தும் சீனா, கொரியா போன்ற நாடுகளிலிருந்து இறக்குமதி செய்யப்படுபவை. அமெரிக்காவில் சில ஆண்டுகளுக்கு முன், காலாவதியான, குழந்தைகளுக்கான உணவை, இவர்கள் விற்றதாக, பெரிய புயல் கிளம்பியது. இறுதி விசாரணையில், இவர்கள் அதை, சீனாவில் இருந்து இறக்குமதி செய்ததாக தெரிய வர, அனைத்தும் அழிக்கப்பட்டு, இறக்குமதியும் தடை செய்யப்பட்டது. அதேபோல் துணிகளை வங்கதேசம், ஏழை மத்திய அமெரிக்க நாடுகளான குவாதமாலா, நிகராகுவா போன்ற நாடுகளில், குழந்தை தொழிலாளர்களை வைத்தும், கொத்தடிமைகளை வைத்தும் தைப்பதாக புகார் உண்டு. விவசாயிகளுக்கு நன்மை என்று, அரசு கூறுவது மிகப்பெரிய பொய். இவர்களுடைய லாபத்திற்காக ஜி.எம்., விதைகள் மற்றும் அதிகமான இறைச்சிக்காக கோழிகளுக்கும், ஆடுகளுக்கும், இறைச்சி கழிவினால் செய்யப்பட்ட தீவனத்தை தருவதாகவும் புகார் உண்டு. இதனால், மண்ணின் வளம் கெடுவதுடன், இறைச்சியினால், "இ-கோலி' நோய் தொற்றும் ஏற்படும். அமெரிக்காவில், இந்நிறுவனங்களால் அழிந்த சில்லரை வியாபாரிகள் பல லட்சம் பேர். அவர்கள் ஒரு கடை திறந்தால், அந்த பகுதியிலுள்ள, 90 சதவீத கடைகள் மூடப்பட்டு விடுவதாக புகார் எழுந்துள்ளது. அதே நிலைமை இங்கேயும் வரலாம். இக்கடைகளில், தொழிலாளர்களுக்கு பணி பாதுகாப்பு கிடையாது. சங்கம் வைத்துக் கொள்ளும் உரிமையும் இல்லை. "ஷிப்ட்' முறை சரியாக வகுக்கப்படவில்லை. "ஓவர்டைம்' போன்ற அம்சங்கள் மிகக் குறைவு. அனைத்து பொருட்களும், சீனாவிலிருந்து இறக்குமதி செய்யப்பட்டால், உள்ளூர் தயாரிப்புகள் காணாமல் போகும். அரசின் இந்த திடீர் முடிவால், மக்கள் எந்த பயனும் அடைய மாட்டார்கள். உடனடியாக, அரசு இதை திரும்பப் பெற வேண்டும்.

Read more...