தேன் பெட்டிகள் வைத்து, 'முருங்கைத்தேன்'

துாத்துக்குடி மாவட்டம், ஏரல் அருகில் உள்ள, சாயர்புரம் முருங்கைத் தோட்டத்தில், தேன் பெட்டிகள் வைத்து, 'முருங்கைத்தேன்' உற்பத்தி செய்து வரும் ஆனந்த்: அடிப்படையில விவசாயக் குடும்பம் தான். சின்ன வயசுலயே சொந்தமா ஏதாவது தொழில் செய்யணும்னு ஆர்வம் இருந்துச்சு. பி.ஏ., பொருளாதாரம் படிச்சு முடிச்சதும், காளான் பண்ணை வைக்கலாம்னு, அதுக்கான பயிற்சி வகுப்புல கலந்துக்கிட்டேன். மதுரையில், காளான் பண்ணை ஆரம்பிச்சேன். அறுவடை செஞ்ச காளான்களை ஒரே நாள்ல விற்பனை செய்துடணும். ஆனா, விற்பனை செய்ய முடியல. அதனால, காளான்கள் வீணாகி, நஷ்டம்
ஆகிடுச்சு.இனிமேல் விவசாயம் செஞ்சாலும் சரி, உற்பத்தி செஞ்சாலும் சரி, அதன் மூலமா கிடைக்கிற பொருளை இருப்பு வெச்சு தான் விற்பனை செய்யணும்னு முடிவு எடுத்தேன். அப்படியொரு தொழிலைத் தேடினேன். அப்போது தான், தேன் வியாபாரம் செய்யலாம்னு யோசனை தோணுச்சு. கோயம்புத்துார் மாவட்டம், விவசாயம் நிறைஞ்ச பகுதி. அதனால அந்தப் பகுதியில தேன் உற்பத்தி செய்றவங்ககிட்ட, தேனை வாங்கி, விற்பனை செய்ற தொழிலை ஆரம்பிச்சேன்; ரெண்டு வருஷம் போச்சு.
கோயம்புத்துார் தமிழ்நாடு வேளாண் பல்கலைக்கழகத்துல தேனீ வளர்ப்பு குறித்த ஒரு வாரப் பயிற்சியில கலந்துகிட்டேன். பிறகு, நண்பர் ஒருவர் தோட்டத்துல, 10 பெட்டிகளை மட்டும் வெச்சு, வளர்த்துப் பார்த்தேன். பிறகு, பெட்டிகளை அதிகமா வைக்க ஆரம்பிச்சேன். பெட்டிகளோட எண்ணிக்கையும், உற்பத்தியும் அதிகமாகிடுச்சு. இப்ப, 'மதுரம் இயற்கை தேனீ பண்ணை'ங்கற பேர்ல கோயம்புத்துார்லயும், துாத்துக்குடியில இருக்கும், என் சொந்த நிலத்துலயும், 950 பெட்டிகள் மூலம் தேன் உற்பத்தி செய்துட்டு வர்றேன்.
புதிதாகக் கூடு கட்டி,தேன் அறுவடை செய்ய, மூன்று மாதங்கள் ஆகும். வாரம் ஒருமுறை கட்டாயம் பெட்டிகளைத் திறந்து, ஒவ்வொரு சட்டகத்தையும் எடுத்துப் பார்க்க வேண்டும். தேனீக்கள் சரியாகக் கூடு கட்டுகிறதா; நோய்கள் ஏதும் தாக்கியுள்ளதா என்பதைக் கண்காணிக்க வேண்டும். ஜனவரி முதல், மார்ச் வரையிலும், ஜூன் முதல், ஆகஸ்ட் வரையிலும் அதிகமாகப் பூப்பூக்கும். இந்த மாதங்களில் அதிகமாகத் தேன் சேகரிக்கலாம். ஏப்ரல் முதல், மே வரையிலும், செப்டம்பர் முதல், டிசம்பர் வரையிலும் பூக்கள் குறைவாகப் பூக்கும். தேன் உற்பத்தியைப் பொறுத்தவரைக்கும் வருஷத்துல, ஆறு மாதம் தான் அதிக உற்பத்தி நடக்கும். மழைக்காலம் உள்ளிட்ட மற்ற, ஆறு மாதங்கள் உற்பத்தி குறைவாக இருக்கும். என்கிட்ட இருக்கும், 950 பெட்டிகள் மூலமா, ஒரு வருஷத்துக்குச் சராசரியா, 12 ஆயிரம் கிலோ தேன் கிடைச்சுக்கிட்டு இருக்கு; 31 லட்ச ரூபாய் வருமானம் கிடைக்குது!

Read more...

எதையுமே மகிழ்ச்சியுடன் செய்யுங்கள்.

'பாசிட்டிவ்' ஆக இருப்பவர்களோடு பழகுங்கள். நம்மை சுற்றி எப்போதுமே, 'பாசிட்டிவ் வைப்ரேஷன்' இருந்தால், நாம் இயல்பாகவே அதிக முனைப்போடு ஒரு விஷயத்தை செய்வோம். எனவே, எதிர்மறை எண்ணத்தோடு ஒரு செயலை செய்பவர்களை, எப்போதும் பக்கத்தில் வைத்துக் கொள்ளாதீர்கள்.
உற்சாகமாக இருங்கள்: சோகத்தை விட்டொழித்து, எப்போதும் உற்சாகம் கொப்பளிக்க வேலை செய்யுங்கள். இந்த வேலையை செய்ய வேண்டுமே என, செய்து முடிக்காதீர். இந்த வேலையை நம்மை விட வேறு யாரும் இவ்வளவு சிறப்பாக செய்துவிட முடியாது என்பதை, மற்றவர்களுக்கு உணர்த்த வேண்டும் என, எண்ணி வேலை பாருங்கள்.
'பவர்புல்'லாக உணருங்கள்: உடல் வலிமை, பண வலிமை எல்லாவற்றையும் தாண்டி, மன வலிமை மிக முக்கியம். உங்களை போல, இந்த உலகத்தில், 'பவர்புல்' ஆனவர் யாருமில்லை என்றால், உடனே சிரிக்காதீர்கள்.
இது தான் நிஜம். உங்களின், 'பெஸ்ட்' எது என்பது, உங்களுக்கே இன்னும் தெரியவில்லை. உங்கள் வலிமையை உணர்ந்து செயலாற்றினால் நீங்கள் வேற, 'லெவல்' ஆள்.
நேசியுங்கள்: உங்களை நீங்களே நேசியுங்கள். இந்த உலகத்தில் தன்னை நேசிக்காத மனிதனால், வெற்றியடையவே முடியாது.
உங்களுக்கு பிடிக்க, உங்களை எப்படி மாற்ற வேண்டுமோ அப்படி மாற்றுங்கள். உங்கள் மீது நீங்களே அன்பு செலுத்துங்கள். நீங்கள் புறப்பட்டு எழுந்தால், உங்களை வெல்ல யாருமே இல்லை என்பதை, மனதுக்கு புரிய வையுங்கள்.
உங்களை போல அழகானவர் யாரும் இல்லை; திறமையானவர் யாரும் இல்லை என்பதை, மீண்டும் மீண்டும் உங்களுக்கே நினைவுபடுத்திக் கொள்ளுங்கள்.
முயற்சி தொடரட்டும்: வாழ்க்கை ஒரு பயணம். அடுத்த நிமிடம் உங்களுக்கு என்ன நடக்கும் என, தெரியாது.
இந்த நீண்ட நெடும் பயணத்தில், ஒரு சிலருக்கு, வெற்றிகள் எளிதில் வரும், சிலருக்கு தாமதமாக வரும். அதற்காக சோர்ந்து விடக்கூடாது. வெற்றிக்கு என்ன செய்ய வேண்டும் என்பதை ஆராய்ந்து, அதை தொடர்ந்து செயல்படுத்திக் கொண்டே இருங்கள்.
வாழ்க்கை நிரந்தரம் இல்லாதது. ஆனால், 'பாசிட்டிவ்' எண்ணத்துடன் தொடர்ந்து பயணம் செய்தால், உங்களுக்கு வெற்றி கிடைக்கிறதோ இல்லையோ, உங்கள் பயணம் மகிழ்ச்சியாகவும், பிடித்தமானதாகவும் இருக்கும்.

Read more...

துாங்கும் போது வியர்ப்பது.

உடல் உழைப்பில் ஈடுபட்ட பின், வியர்ப்பது இயல்பு. உடல் வெப்பம் அதிகமாகும் போது, நரம்பு மண்டலத்தின் துாண்டுதலால், வியர்வை சுரப்பிகள், தங்கள் பணியை செய்ய துவங்கும்; அதைத்தான், 'வியர்க்கிறது' என்கிறோம். ஆனால், உடல் உழைப்பில்லாமல் ஓய்வில் இருக்கும்போது வியர்வை அதிகரிக்கிறது என்றால், அது இயல்பானதல்ல. குறிப்பாக, சிலருக்கு இரவில் உறங்கும்போது, அதிகமாக வியர்வை வெளியேறும். இப்படி, தவறான நேரத்தில் உடல் வெப்பம் அதிகரிப்பது, ஆரோக்கிய குறைபாடின் அறிகுறி. உடலில், 'ஹார்மோன்' மாற்றம் நிகழ்பவர்களுக்கு, அதன் காரணமாக வியர்வை வெளியேற்றம் அதிகரிக்கும். பூப்பெய்திய துவக்க காலம், கர்ப்பிணிகள் மற்றும் 'மெனோபாஸ்' நிலையிலிருக்கும் பெண்களுக்கு, ஹார்மோன் சமச்சீரின்மை ஏற்படும் வாய்ப்பு அதிகம் என்பதால், அவர்களுக்கும் இந்தப் பிரச்னை ஏற்படலாம். பொதுவாக, காய்ச்சலோடு தொடர்புடைய நோய்த்தொற்று பாதிப்புகள், அதிக வியர்வைக்கு காரணமாக இருக்கும். தொற்று பாதிப்புகள் ஏற்படும்போது, உடல் வெப்பம் அதிகரிக்கத் தொடங்கும். இயல்பை விட, இரவில் தான் அது அதிகமாக இருக்கும். காசநோய், எலும்பு அழற்சி போன்றவை இருந்தால், துாக்கத்தின்போது அதிகம் வியர்க்கும்.ஒருவர் உறங்கும்போது, உடலில் ரத்தச் சர்க்கரை அளவு குறையத் துவங்கினால், வியர்வை அதிகம் வெளியேறும். ஒவ்வாமை உள்ள மருந்துகளை உட்கொண்டால், பக்கவிளைவாக, வியர்வை வெளியேறுவது அதிகமாகும். உடலில் அமிலத் தன்மை அதிகரிக்கும்போது, செரிமானக் கோளாறு ஏற்பட்டு, நெஞ்செரிச்சல் உண்டாகும். அதோடு துாங்க சென்றால், எரிச்சல் அதிகரித்து வியர்க்க ஆரம்பிக்கும்.

ஏற்கெனவே நரம்பு சார்ந்த பிரச்னை இருப்பவர்கள், அடிக்கடி பதற்றமடைவர். பக்கவாதம் இருப்பவர்களுக்கு, அது தீவிரமடைந்தால், உறக்கத்தில் வியர்ப்பது அதிகரிக்கும். இந்த பாதிப்பு உள்ளவர்கள், உடல்நலச் சிகிச்சையோடு சேர்ந்து, உளவியல் சிகிச்சையும் எடுக்க வேண்டும். முறையான மருத்துவ ஆலோசனையைக் கட்டாயம் பெற வேண்டும்.

Read more...