குழந்தைகளும், பிளே ஸ்கூலும்

இன்றைய குழந்தைகள், 2 வயதிலேயே, 'பிளே ஸ்கூலில்' சேர்க்கப்படுகின்றனர். பள்ளி அட்மிஷனுக்கு முன், அந்தப் புதிய சூழலுக்கு ஈடுகொடுக்கும் அளவுக்கு அவர்களின் உடல் நலன் மற்றும் மனநலனை உறுதி செய்ய வேண்டியது அவசியம்.பயண துாரம் குறைவாக, வீட்டுக்கு அருகில் இருக்கும் பள்ளியில் குழந்தைகளை சேர்ப்பது நலம்; இதனால், அலைச்சல், அசதியைத் தவிர்க்கலாம். குழந்தைகளை தங்கள் அரவணைப்பில் மட்டுமே வைத்து வளர்க்கும் பெற்றோர், பள்ளியில் சேர்ப்பதற்கு முன், அவர்களை நண்பர், உறவினர் வீடுகளுக்கு சில மணி நேரம் அழைத்துச் சென்று, அங்கிருக்கும் பெரியவர், குழந்தைகளுடன் பழக வைக்க வேண்டும்.கிண்டர் கார்டன், கே.ஜி., வகுப்புகளில் குழந்தை களை மதிய வேளைகளில் சிறிது நேரம் உறங்க வைப்பதால், வீட்டிலும் அவர்களை அதே நேரத்தில் உறங்க வைத்துப் பழக்கலாம். ஆரம்பத்தில் சில வாரங்களுக்கு குழந்தைகள், பள்ளி செல்ல மறுத்து அடம் பிடித்து அழுவது இயல்பானது. அதுவே மாதங்களைக் கடந்தும் தொடர்ந்தால், என்ன பிரச்னை என, குழந்தையிடமும், பள்ளித் தரப்பிடமும் விசாரிக்க வேண்டும்; குழந்தைகளின் அன்றாட நடவடிக்கைகளையும் கூர்ந்து கவனிக்க வேண்டும்.தன் பார்வையில் படும் கவர்ச்சிகரமான பொருட்களை, தனக்கு சொந்தமாக்க நினைப்பது சில குழந்தைகளின் இயல்பு. இக்குழந்தைகளை, பள்ளியில் சேர்ப்பதற்கு முன், செய்முறையுடன் விளக்கி, 'இது தவறு' என்பதை, பெற்றோர் புரிய வைக்க வேண்டும்.பசித்தால் சொல்லத் தெரிவது, தானே சுயமாகச் சாப்பிடுவது, சிறுநீர் மற்றும் மலம் வந்தால் பாத்ரூமில் மட்டும் ெவளியேற்றுவது, மூக்கில் சளி ஒழுகினால், கைக்குட்டையில் துடைத்துக் கொள்வது, சாப்பிடும் முன், பின் கைகளைக் கழுவுவது உள்ளிட்ட அவசியமான பழக்கங்களை, பள்ளிக்கு அனுப்பும் முன் கற்றுக் கொடுக்க வேண்டும்.குழந்தையின் வயதுக்கு ஏற்றாற்போல, பெற்றோரின் மொபைல் எண், வீட்டு முகவரியை சொல்ல தெரிய வேண்டும்.வாரம் ஒரு முறை நகம் வெட்டுவது, குழந்தைக்கு தொந்தரவு தராத வகையிலான, 'ஹேர்கட்' போன்றவை முக்கியம். பெண் குழந்தைகளுக்கு தொங்கட்டான், ஜிமிக்கி, செயின் போன்ற அணிகலன்கள், விளையாடும்போது, சண்டையிடும்போது இழுக்கப்பட்டு விபரீதம் ஏற்பட வாய்ப்புள்ளதால், அவற்றைத் தவிர்க்க வேண்டும்.விடுமுறை நாட்களிலேயே கண் பரிசோதனை, காது வலி, பல் வலி, சரியாகச் சாப்பிடாமல் இருப்பது, மூச்சுத்திணறல், தொடர் இருமல் உள்ளிட்ட உடல் நலப் பிரச்னை இருந்தால், அதைக் கண்டறிந்து சரிபடுத்த வேண்டும்.'குட் டச், பேட் டச்' மற்றும் யாரிடம் எப்படி பழக வேண்டும் உள்ளிட்ட பாலினம், பாலியல் சார்ந்த விஷயங்களை, குழந்தைகளுக்கு புரியும் வகையில் சொல்லித் தர வேண்டும். பொதுவாக, 10 வயதுக்கு மேற்பட்ட குழந்தை களையே, ஹாஸ்டலில் சேர்க்க வேண்டும்.

Read more...

நாம் தடம் மாறினால், நம் குழந்தைகளும் தடம் மாறும்.

இன்று,  40 வயதில் இருப்போர் தான், படிக்காத தாய், தந்தையரை பெற்ற கடைசி தலைமுறை. நம் குழந்தைகளுக்கு, 'நான்கு பேருக்கு நல்லது செய்கிற மாதிரி வாழ்' என்று சொல்லி வளர்ப்பதை தவிர, பெரிதாக ஒன்றுமே கொடுத்துவிட முடியாது. நம் குழந்தைகளை பசியில்லாமல் வளர்க்கலாம்; ஆனால், உழைப்பின் வலி தெரியாமல் வளர்க்கவே கூடாது. நம் குழந்தைகளுக்கு எதை கொடுக்கக் கூடாதோ, அதை கொடுக்கக் கூடாது; எதை கொடுக்க வேண்டுமோ, அதனுடைய உண்மையை எடுத்துச் சொல்லி, கொடுக்க வேண்டும். ஜெயிக்கிறோமா, தோற்கிறோமா என்பது முக்கியமில்லை. வாழ்க்கையில் விரும்பியது செய்தபடி இருக்கிறோமா... அது தான் முக்கியம். விரும்பியதை செய்யும்போது கிடைக்கும் பெரிய மகிழ்ச்சியை, குழந்தைகளுக்கு கொடுக்கக்கூடிய சூழ்நிலையை, நாம் உருவாக்க வேண்டும்.நீங்கள் கோபமாக இருந்தாலும் சரி, வருத்தமாக இருந்தாலும் சரி, குழந்தைகளை அலட்சியப்படுத்தக் கூடாது. நல்ல செய்திகளை, நல்ல இணையதளங்களை,  நல்ல விஷயங்களை ஆசிரியர்களும், பெற்றோரும் சொல்லவில்லை என்றால், பல கசடான விஷயங்கள், குழந்தைகள் மனதில் கொட்டப்படும். உங்கள் குழந்தைகள், நிறைய சம்பாதிக்கப் போகிறவர்களாக வளர்க்க வேண்டும் என்று விரும்ப வேண்டாம். நான்கு பேர், 'உங்கள் குழந்தையால் வாழ்கிறோம்' என்று சொல்வது போன்ற வாழ்க்கையை, அவர்களுக்கு வாங்கிக் கொடுங்கள். அது தான் பெற்றோராகிய நீங்கள், உங்கள் குழந்தைகளுக்கு செய்யும் மிகப்பெரிய கடமை. நம் குழந்தைகள், நாம் சொல்வதைக் கேட்டு வளர்வதில்லை. நாம் எப்படி வாழ்கிறோமோ, அந்த வாழ்க்கையைப் பார்த்து வளர்கிறது. நாம் தடம் மாறினால், நம் குழந்தைகளும் தடம் மாறும்.

Read more...

திட்டமிட்டு செயல்படுத்தினால் நேரத்தை கட்டுப்படுத்தலாம்.

மண்ணில் மனிதன் பிறந்ததிலிருந்து நேரத்தின் பங்கு முக்கியமானது. நேரத்தை பொறுத்து தான் அனைத்து செயல்களும் அரங்கேறுகின்றன. ஒன்றை நாம் அடைய வேண்டு மெனில்,நேரத்தின் போக்கிற்கேற்ப ஓடிக் கொண்டிருக்கிறோம். ஏதாவது ஒரு நேரத்தில் வாழ்க்கை வாழ்வதை மறந்துவிட்டு ஓடுகிறோமே என்று தோன்றும். இதற்கு காரணம் நேரத்தை முறையாக திட்டமிட்டு பயன்படுத்தாமல் இருப்பது தான். 
சமநிலைப்படுத்துங்கள்
சமநிலை என்பது எல்லாவற்றிலும் இருப்பதால் இப்பூவுலகம் அன்றாடம் இயங்கிக் கொண்டிருக்கிறது. நாம் வேலை செய்வதில் துவங்கி வேடிக்கை விளையாட்டுகளில் ஈடுபடுவது முடிய அனைத்து செயல்களுக்கும் இது பொருந்தும். ஒரு குறிப்பிட்ட நேரத்தில் ஒரு செயலை எந்த அளவு முடிக்க முடியும் என திட்டமிட்டு அதன் படி, நேரத்தை சமநிலைப்படுத்துங்கள். பின் அந்த செயலை துவங்கி வெற்றிகரமாக முடியுங்கள். 
உங்களை அறியுங்கள்
நேர மேலாண்மையில் மிகவும் முக்கியமான ஒன்று இது தான். உங்களை நீங்கள் முழுமையாக அறிந்திருந்தால் மட்டுமே நேரத்தை உரிய முறையில் கட்டுப்படுத்தி நிர்வகிக்க முடியும். ஒரு காரியத்தை உங்களால் செய்ய முடியுமா? செய்வதற்கான திறமை உள்ளதா? செயல் திறம் உள்ளதா? உள்ளிட்டவற்றை நீங்கள் அறிந்தால் மற்றவர்களின் புத்திமதியோ, உதவியோ உங்களுக்கு தேவையில்லை. உங்கள் நேரத்தை தரமாக நிர்ணயித்து காரியத்தை வெற்றிகரமாகவும் குறித்த நேரத்திலும் முடிப்பீர்கள். 
எதார்த்தமாக பழகுங்கள்
எதார்த்தமான விஷயங்களை உங்களிடம் இருந்து எதிர்பார்க்க கற்றுக்கொள்ளுங்கள். நீங்கள் செய்யும் செயல்களை உங்கள் திறமை மற்றும் செயல்திறம் ஆகியவற்றுடன் ஒப்பிட்டு பாருங்கள். கடினமான செயல்களை உங்கள் மீது சுமத்திக் கொள்ளாதீர்கள். 
செயலை பிரித்துக் கொள்ளுங்கள்
பெரிய அளவிலான ஒரு காரியத்தை செய்யத் துவங்கும் முன் அதை சிறு சிறு பாகங்களாக பிரித்துக் கொள்ளுங்கள். இல்லையெனில் வேலைப்பளு மற்றும் மனஅழுத்தம் உங்களை மூழ்கடித்து விடும். நேரத்திற்கு தகுந்தவாறு சிறு பாகங்களாக செயலை பிரித்து செய்தால் அதை முழுமையாகவும், பதட்டம் இல்லாமலும் பார்க்கலாம். 
திட்டமிட கற்றுக்கொள்ளுங்கள்
உங்களுடைய வேலைகளையும் அவற்றை தகுந்த நேரத்தில் முடிப்பதற் கான வழிகளையும் திட்டமிட கற்றுக் கொள்ளுங்கள். ஏனெனில் மேற்கூறியது போல், திட்டமிடும் பொழுதே ஒரு செயலுக்கான நேரமும், செயலை பாகங்களாக பிரித்து முடிப்பதற்கான முயற்சிகளும் நமக்கு தெரிந்துவிடும். இது போல் நாம் மேற்கொள்ளும் ஒவ்வொரு காரியத்தையும் திட்டமிட்டு செயல்படுத்தினால் நேரத்தை கட்டுப்படுத்தலாம்.         -     தினமலர்

Read more...